Kastigador Balita Mindanao

CIDG Davao, gipasalig nga dili mukatag ang sex scandal nila Ramgen Revilla ug Janelle Manahan

Thursday, 26 January 2012 07:45

DAVAO CITY - Gipasalig sa CIDG Davao nga ila sab nga subayon ang mga kasigbit nga dapit dinhi sa dakbayan sama sa Tagum ug Digos arun nga kumpiskahon ang mga mikatag nga sex scandal video sila ni Ramgen Revilla ug Janelle Manahan.

Kahinumduman nga hingpit ng gipasakahan ug kasong paglapas sa Article 201 sa Revised Penal Code kun Immoral doctrines, obscene publications, and exhibitions and indecent shows si Omar Bago Norodin, 18, residente sa Mini Forest, Barangay 23-C Poblacion ning dakbayan human nga nakuha sa iyang posisyon ang mga pirated DVD sa nahisgutan nga sex video.

Gipasakahan kagahapon ang suspek pinaagi sa summary inquest procedure sa City Prosecutor’s Office ilalom nila ni PO1 Angelo Begani ug CIS Fernando Ranay sa Criminal Investigation and Detection Group 11.

Gikanayong miabot sa 295 ka mga kopya ang gibaligay sa suspek sa dalang sa San Pedro, ning siyudad.

Nasayran nga gipanid-an na sa mga sakop sa CIDG ang mga naninda ug malaw-ay nga mga palabas butang nga nasikop ang suspek atol sa gipahigayon nga pagronda sa CIDG kaniadtong milabay nga adlaw.

Amerikano namatay sa hotel

DAVAO CITY- USA ka American national ang nakaplagang patay sud sa iyang lawak sa Waterfront Insular Hotel didto sa dalang Lanang, dakbayan sa Davao.Wednesday, January 25, 2012

Nakaplagan alas 6:21 sa gabii niadtong Martes mao si Bryant Collins, 49, lumad nga taga Oak Lawn, Illinois, USA.

Base sa spot report sa Sasa Police Station, nasayran nga nag-check-in si Collins sa maong hotel niadtong Enero 19, 2012.

Ang biktima nakaplagan sayo sa buntag niadtong Lunes sa nurse sa hotel nga nagsige og suka sanglit dunay gibati sa iyang tiyan.

Gitambagan sa nurse si Collins nga magpa-ospital, apan nagdumili siya.

Alas 6:21 sa gabii niadtong Martes, samtang nag-roving ang gwardiya sa hotel, nakaplagan ang patay nga lawas ni Collins sa Room 203.

Nahipus sa mga sakop sa Scene of the Crime Operatives (Soco) ang pipila ka basiyo sa beer, soft drinks ug nagkadaiyang klase sa tambal.

Gihaya karon ang biktima sa Angel Funeral Homes sa dalang Torres, ning siyudad.

Pulis nga bigtime pusher positibo sa gidiling druga

SULTAN KUDARAT -- Positibo sa paggamit og gidiling druga ang pulis nga gitudlo nga bigtime drug pusher kinsa nadakpan alas 10:00 sa buntag niadtong Lunes didto sa lungsod sa Isulan.

Ang pulis mao PO1 Mushiv Abas Manigpil, 27, minyo, nadestino sa Philippine National Police (PNP) Maritime Unit sa Cotabato City.

Apil nga nadakpan ang iyang pag-umangkon nga si Nasrula Pamanay, 18, ulitawo, molupyo sa Talitay, Maguindanao.

Gibutyag ni Sultan Kudarat Police Provincial Director Danilo Peralta nga nasikpaw ang mga suspek atol sa gilusad nga joint blocking force sa PNP 12 Regional Mobile Group, Tacurong Police Station ug Sultan Kudarat Police Station sa Kababayan Center didto sa Barangay Kinram, Isulan.

Giharang sa kapulisan ang gisakyan sa mga suspek nga pampasaherong L300 van diin nakuha gikan kanila ang tunga sa milyon ka pesos nga shabu.

Nakuha sab gikan sa mga suspek ang cash nga P40 mil, usa ka M16 armalite rifle, granada ug usa ka kalibre .45 nga pistola.

Gipriso na ang mga suspek sa selda sa Sultan Kudarat Police Provincial Office samtang ang shabu gidala sa PNP Crime Laboratory sa General Santos City.

Suma ni Peralta nga dugay na nilang gisundan ang lihok ni Manigpil nga gitumbok nga maoy nagasuplay og shabu sa kinatibuk-ang rehiyon dose.

Giimbestigahan karon sa Philippine Drug Enforcement Agency 12 ang suspek aron masikpaw ang iyang mga kaubanan nga nalambigit sa pagpayuhot og gidiling druga. 

Magtiayon gipamusil, grabe

SHARIFF AGUAK, Maguindanao -- Grabe ang kahimtang sa magtiayon human gipamusil alas 12:20 sa udto niadtong Martes.

Giila ang mga biktima nga sila si Arbaya Opam, 42, magtutudlo sa Shariff Aguak National High School, ug ang iyang bana nga si Suharto.

Gikanayon ni 6th Infantry Division Public Affairs Chief Colonel Prudencio Asto nga sakay ang magtiayon og motorsiklo gikan sa tunghaan ug pauli na sa ilang balay sa dihang nahitabo ang pagpamusil.

Sumala pa nga gisundan ang mga biktima sa wala mailhing mga suspetsado nga sakay sab og XRM nga motorsiklo ug gipamusil gamit ang kalibre .45 nga pistola.

Natumba ang gisakyan sa magtiayon kilid sa kalsada samtang dali sab nga misibat ang mga suspetsado paingon sa hilit nga dapit sa maong lugar.

Daling gitabang ang mga biktima ug gidala sa Maguindanao Provincial Hospital apan gibalhin dayon sa Cotabato Regional and Medical Center sa siyudad sa Cotabato gumikan sa grabeng mga samad nga naangkon sa ilang kalawasan.

Si Arbaya naigo sa paa nga milapos sa sampot sa iyang bana.

Hinuon, mga suspek nailhan na sa mga otoridad apan di pa nila mapagawas ang bansagon kay padayon pa ang ilang gihimong imbestigasyon.