GIAWHAG ang publiko nga isumbong sa buhatan sa Department of Education sa Davao Region kon duna silay masayran nga mga magtutudlo nga mangolekta og bayad sa himuong Early Registration sa Enero 28.
Kini maoy awhag ni Atty. Renato Bartolo Jr., legal officer sa DepEd sa registration, alang sa kindergarten, Grade 1, out-of-school youth (OSY), out-of-school children (SC), OSY ug OSC nga may disabilities nag-edad og 5 ngadto 18 anyos.
Subling gibarugan sa DepEd nga gidili ang pagpangolekta sa mga maestro ngadto sa mga ginikanan.
Ang “No Collection Policy” usa sa gihingusgan nga kampanya sa DepEd. Kinsa man ang makalapas, suma ni Atty. Bartolo, posibleng matangtang sa serbisyo.
Hinuon gitin-aw niya nga kon di kaayo bug-at ang mahimo nga salaod, pahimangnoan una ang magtutudlo.
"Kon miundang dayon sila after masultihan, thats good. Pero kon padayon gihapon sila, diha na gyud sila mameligro," dugang sa abogado.
Gidugang ni Bartolo nga sa kasamtangan naghimo sila'g imbestigasyon labot sa mga magtutudlo nga nalambigit sa ingon niini nga binuhatan.
Dugang gitin-aw ni Bartolo nga ang Parent Teacher's Association (PTA) fee, dili compulsory o pinugsanay, apan boluntaryo lamang.
"We are reminding them again and again gyud nga di mangolekta. Mao nga ang public, the parents, even the media is a big help sa among kampanya."
Gipasalig ni Bartolo nga naningkamot ang ahensiya nga malimpyohan ang ilang han-ay sa mga tawong di mahibawo nga motuman sa mando aron himuong ehemplo sa uban.
"We are cleansing our department sa mga members nga ingon ani, mao nga we need the help of the public."
Walang komento:
Mag-post ng isang Komento