Kastigador Balita Mindanao

Babaye gipusil, patay

Tuesday, January 31, 2012

BANSALAN, Davao del Sur - Usa ka babaye ang gipusil patay sa wala mailhing mamumuno kinsa nagsakay og motorsiklo alas 10:00 sa buntag niadtong Lunes.

Ang biktima nailhang si Violeta Sonio, kasamtangang nagpuyo sa Barangay Alegre, apan lumad nga taga Cainta, Rizal sa Luzon.

Gikanayon ni Senior Inspector Deozar Almasa, hepe sa kapulisan sa Bansalan Police Station, nagsakay og motorsiklo ang biktima apan gisundan siya sa mamumuno ug gipusil didto sa Barangay Lower Rizal sa maong lungsod.

Nakahiagum og daghang samad pinusilan sa lawas ang babaye mao nga nakabsan gilayon sa kinabuhi.

Nasayran nga ang biktima nagdala sab sa pangalan nga usa ka Violeta Dizon nga nakita sa usa ka identification card samtang pangalang Hermilinda Dizon ang nakabutang sa iyang cedula.

Dugang nasayran nga di pa dugay, adunay nakaaway ang biktima sa iyang gipuy-an nga lugar ug iya kining gipa-blotter sa barangay hall.

Giimbestigahan pa sa kapulisan ang motibo sa pagpatay sa biktima.

Sa pagkakaron, gihaya na sa usa ka punerarya sa maong lungsod ang patay'ng lawas sa biktima apan wa pay bisan usa ka tagtungod ang mipatim-aw aron nga kuhaon siya. (Orlando B. Dinoy)

'Walay nahitabong pagpabor alang sa promosyon'

Wednesday, 01 February 2012 05:38

DAVAO CITY - Gipanghimakak ni bag-ong  Police Information Officer sa Police Regional Office eleven nga si Supt. Martial Mariano Mahistrado  ang pasangil nga pabor-pabor ang pagka-promote sa pipila ka mag commission officer. 

Sumala ni Mahistrado, nga kung wala man misaka ang ranggo sa usa ka Police posibleng wala kini nakapasa sa gitakdang qualification standard nga gikinahanglan sa PNP.

Dugang sab sa opisyal nga usa sab sa mga gisuta ang mga pasindungog nga naangkon niini, mga accomplishments samtang ang laing 20 porsyento nga gikinahanglan ang maggikan sa mga panel nga mo-interview sa usa ka Police. 

Nasayran nga mikabat sa 261 ang nag-apply sa promotion alang sa pagka- PO1 apan 147 lamang ang quota niini.

Samtang ang mga Promotion board ang gilangkuban sa ni Police chief Supt. George Corpuz ang Deputy Regional Director for administration, mga representante sa NAPOLCOM, DILG ug mga Staff sa PRO.

Kahinumduman nga adunay mga mireklamo human nga nalabwan na matud pa sa pipila ka mga na-promote ang ilang mga senior officer.

4 patay human gidaro sa 10-wheeler truck ang 1 balay sa Surigao del Sur

Tuesday, 31 January 2012 13:58

BUTUAN CITY - Upat ka mga hitchhikers sa usa ka 10-wheeler truck ang patay samtang laing tulo ang angol human midasmag sa usa ka balay ang ilang gisakyan dihang nawad-an og brake pasado alas-kwatro kagahapon sa hapon sa provincial road sa Cabiles Subdivision sa Brgy. Telaje, Tandag City sakop sa Surigao del Sur.

Naila ang mga namatay'ng biktimang sila Cornelia Mocay, Sherly Acevedo, parehong hingkod ang edad ingon man ang duha ka 3rd year high students sa Jacinto Elpa High School nga sila Jerome Dominguez og Roberto Gabe Jr.

Migawas sa inisyal nga imbestigasyon nga ang trak nga gimanehuan ni Virgilio Bolonia Corlit, 52-anyos, residente sa Brgy. Rosario, Tandag City, nga duna'y kargang balas, nagbiyahe gikan sa Brgy. San Isidro og padulong unta sa sentrong bahin sa maong siyudad.

Pag-abot sa maong dapit, nag-malfunction matud pa ang brake sa sakyanan hinungdan nga na-sidesweep niini ang traysikol nga gimanehuan ni Ryan Policarpio kinsa wala ma-angol.

Apan mibangga pa ang trak sa panimalay ni Constancia Bocario og tungod sa kakusog sa impact, nagrabehan ang mga misakay sa atop sa trak nga sila Dominguez og Gabe Jr. apil sila Mocay og Acevedo nga anaa sa passengers' seat.

Ang mga pasaherong naglingkod sa likod sa na-angol nga driver parehong angol usab nga gilangkuban nila Joseph Ramirez og Julius Vellescas, parehong 15-anyos, parehong residente sa Brgy. San ISidro, Tandag City.

Adoption Consciousness Week gipangandaman na sa DSWD Davao region

Tuesday, 31 January 2012 07:14

DAVAO CITY - Gipangandaman na karun sa Department of Social Welfare and Development (DSWD) dinhi sa rehiyon ang pagsaulog sa Adoption Consciousness Week nga magsugod sa Pebrero 4-10 ning kasamtangan nga tuig. 

Buot sa ahensiya nga ikampanya ang responsable nga pagsagop sa mga bata nga adunay temang 'Isulong legal na pag-aampon’. 

Gikanayon ni Sheryl Ann Dumalogdog, DSWD Social Welfare Office 2 nga magpahigayon sila ug motorkada karong Pebrero 4 padulong sa Rizal Park dayon ilusad nila ang gi-andam nga programa.

Samtang subay sa datus sa DSWD sa milabay nga tuig, anaa matud pa sa pito ka mga langyaw nga aplikante ang mi-apply kanila aron makasagop og batang Pinoy, diin anaa sa 50% ang approval number niini.

Kabahin sab sa maong kalihukan ang pagmuntar nila ug Adoption Desk sa nagkadaiyang ahensiya sa gobyerno ug establisemento sama sa National Statistics Office (NSO), Social Security System (SSS) ug Government Service Insurance System (GSIS).